Phek 3
4. Robokva Zo (Kuki) Khaw Muna Pathian Chawng A Tung Dan: Kum 1970-75 han Hawaibari khaw muna Kristian chang sai, Pu. Khawma Betu nin Pu.
Lalte Rokhum indawng in Robokva khaw muna ang rwsen a, ang mini ata hin Baptist Kohhran a van ding ta a chang. Pu. Khawma Betu chu EFCI a alut vit a, na zo chu KCC a alut nawk a, KCC ata a nau dang ngwi in Presbyterian muna ang lut khal nawk a chang. Pu. Lalte indawng bo in Baptist a ang awm ta a chang. Robokva Khaw muna hin Baptist, KCC, nungan Presbyterian Kohhran ang awm a chang. Baptist Kohhran muna ulian chu 23 nin naupang 15, ang reng kan 37 chu ang awm a chang 2013 census lain.
5. Kamalachhara Khaw Muna Zo (Kuki) Ngwi Kiana Pathian Chawng A Tung Dan: Kamalchhara hi tîra chu ‘Kulairam’ in hi ang hawi sin. Kum 1940 han Hawaibari ata Pu. Darlaili Kuki a nau ngwi nin nungan a makpa ngwi nin Kulairam, atun hi Agartala-Assam Lampui kiankawl a, Dalubari Gate a hin khaw ang miding a, ‘Darlaili Kuki Para’ ang ti sin a chang, a nûng a Kamalachhara riming thar ang pek a chang. Pu. Darlaili Kuki kiana hin Hawaibari ata midang Pu. Lalnuaisiaka Rokhum, Pu. Rohlu Kuki, Pu. Pura Kuki, Pu. Datung, Pu. Laisavunga Rokhum, Pu. Sirlukhama nungan Pu. Laibatliana ngwi hi Kamalachhara muna ang hawng resen a chang. Zo (Kuki) ngwi hi atun ang awmna tânga ang awm a, Pu. Sumchongram Hrangkhawl nin ar sang Pu. Sumchonghari Hrangkhawl ngwi chu a ruak na ang awm a chang. Pu. Sumchongram Hrangkhawl in Bwk In siamna ding mun a pek a, kum1949 han tânga Zo (Kuki) awm ngwi nin inruanna nwi in Bwk Intê, a bang chu ramau rua nin a pwchung chu rangai nin ang siam a. Na Bwk In siamna muna han Pu. Bungpuiliana kum 75 changin Bwk In siam dingin ramau rua a la phawr thwi a chang. NZBM ngwi in Kamalachhara Kohhran enkawl dingin Mastor-Evangelist a hawng siah a chang, mun (Bial) Pastor dingin Pastor Digendra Ruram (Garo) chu Dhonchora khaw a siah a chang. Kamalachhara khaw muna Mastor Evangelist in hawng in tawk sai ngwi chu: Mr. Jarib Roram (Garo), Pu. Laisavunga Rokhum, Mr. Bipin Azim, Pu, Lalngakliana Betu nungan Mr. Pitar Sorkar (Bengali). Kamalachhara Kohhran hi Pathian mwriang na vangin a lian zel a, SSBA muna khawm Nu nin Pa dinmuna ding thwi in ang awm ta. Evangelist nin Pastor ngwi khawm chu na Kohhran ta mi lu kwzat maw chu ang lo suak ta a chang. Ram zing muna awm ngwi dingin ngaitua sin Kohhran ang chang, Pathian chawng ril dingin khawm ma ang lak a chang. A masâ a Bwk Intê nwi sin ngwi ha, atun chun Bwk In lian nin a sah pawl ang nwi ta a chang. Na din muna a hawng tung thwi hi Pathian miriangna vang bo a chang a. Lalpa riming chu fak in awm se. Atun hin Kristian indawng 79 ang awm a, Ulian 238 nin naupang 97, ang reng kan 345 ang chang 2013 a census lai in.
Phek <
1 na kir rawh
Phek <
2 na kir rawh
